Islohotlar samaralari ijtimoiy roliklarda

  Toshkentda Ijtimoiy teleradioroliklar IV milliy festivali bo‘lib o‘tdi. O‘zbekiston Elektron ommaviy axborot vositalari milliy assotsiatsiyasi tomonidan o‘tkazilgan tadbirda mamlakatimizdagi nodavlat teleradiokanallar jurnalistlari ijtimoiy ahamiyatga rolik mavzulardagi ijodiy ishlari bilan ishtirok etdi.

Festivalning ochilishida tegishli vazirlik va idoralar, ijodiy va jamoat tashkilotlari, yurtimizda faoliyat ko‘rsatayotgan xalqaro tashkilotlar va diplomatik korpus vakillari, ommaviy axborot vositalari xodimlari ishtirok etdi.

O‘zbekiston Nodavlat elektron ommaviy axborot vositalari milliy assotsiatsiyasi boshqaruvi raisi F.Abduxoliqov va boshqalar Prezidentimiz Islom Karimov rahnamoligida barcha jabhalarda izchillik bilan amalga oshirilayotgan keng ko‘lamli islohotlar, avvalo, inson manfaatlarini ta’minlashga xizmat qilayotganini ta’kidladi. Qabul qilinayotgan qator dasturlar, farmon va qarorlar yoshlarni barkamol etib voyaga yetkazish, milliy an’ana va qadriyatlarimizga ehtirom ruhida tarbiyalashga yo‘naltirilgan. Barcha sohalarda erishilayotgan yutuqlarni xalqimiz, ayniqsa, yoshlarimiz orasida ta’sirchan va hayotiy tarzda keng targ‘ib etish esa bugungi murakkab globallashuv sharoitida tobora dolzarb ahamiyatga ega.

Davlatimiz rahbari tomonidan 2010 yil 12 noyabrda Oliy Majlis palatalarining qo‘shma majlisida taqdim etilgan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasida axborot sohasini isloh qilish, fuqarolik jamiyati institutlarini shakllantirish va rivojlantirish borasida muhim vazifalar belgilangan. Bularning barchasi mamlakatimiz taraqqiyoti va xalqimiz farovonligini yanada yuksaltirishda muhim ahamiyat kasb etishi shubhasiz.